Meahcis

Meahccetuvra

skohterViimmat ledje beassážat. Biret lei vuorddašan friddjabeivviid. Dovddai ahte dárbbaha muhtin friddjabeivviid dál. Ledje ollu áššit barggus, maidda ollu áiggi lei ferten bidjat ja mat ledje váibadan. Olbmát áigo messostallat, muhto Birehis ii lean gal miella. Háliidii leat friddjabeivviid olggu ovddas. Dálki lei juste nu go beassážiid galggai leat ; beaivvádat ja bivval. Muohta čeaskái várregilggaid ja oalgguhii olbmuid meahccái. Biret ja Juhán leigga ge meahccái vuolgime, Juhána guođohanbartii. Doppe ledje buorit guollejávrrit lahkosis ja valjit čuoiganlahtut. Biret lei sihke viššalis čuoigi ja áŋgiris bivdi, nu ahte buot lei sutnje jur miela mielde. Soai leigga gávppašan ja páhkken, dál lei dušše reaga gárrat ja čavget.

Juhánis lei ođđa skohter, Polaris 550, mainna vuoddjáiga. Biret čohkkái Juhána maŋábealde ja dovddai biekka bossume ámadadjui. Son dovddai ilu. Son juoiggastii muhtin oahpes luođi. Gal dat juo lei somá meahcis vuojašit. Gálvoreahka šlivgasii skohtera maŋis ja  márkan fargga njavggodii. Miillat hurge ja ovdalgo beaivváš luoitádii vuojisteigga bartta olggobeallái. Juhán nuollagođii dalán reaga. Biret oaččui Juhánis čoavdaga ja manai sisa. Siste lei galmmas ja seavdnjat. Biret cahkkehii dola ja cahkkehalai čuovggaid. Juhán guttii gálvvuid sisa ja ceggii sudno sabehiid olgoseainni vuostá. Biret čorgii gálvvu sadjái ja himihii vel: ”Na eaba soai niesttehuvvat goit galgan, herskot ledje vaikko man ollu”.

Fargga haksui varas gáfehádja ja barta lei liegganan. Varas gáffe ja šukkoláda lei njálggat guhkes mátkki maŋŋá. Soai guldaleigga rádio ja humadeigga. Ihttin lei geahččalit guollelihku lagamus jávrris vuos, mii lei čuoiganmuttus. Jávrris galge leat sihke rávddut ja dápmohat. Olgun lei áigá sevnnjodan go Juhán cáhpagođii suovasbierggu. Biret ges stellii fiidnát beavddi, gintaliid vel cahkkehii. Suovasbiergu lei buoremus biepmu maid Biret diđii. Maŋŋel borrama ozai Biret spealu mainna golahalaiga áiggi. Gal sudnos lei hearrá dilli ja luopmu lei easkka álgán.

 

This entry was posted in Uncategorized. Bookmark the permalink.