Spábbačiekčan

Spábbačiekčan

Odne lei fas spábbačiekčanhárjehallan ja mun illudin dasa. Lei veahá oanehis áigi skuvlla ja hárjehallama gaskkas ja fertejin doapmalit ruoktot vai ollen boradit unnimus diimmu ovdal hárjehallama. Muđuid gal munnje šaddá vuoissahat. In olle borrat eara go láibbi dahje jogurtta, gaskabeaivvit eai leat ovdal maŋŋel hárjehallama.

Mis lea oba suohtas hárjehallamis. Mu buoremus olmmái, Kristine, hárjehallá maid. Moai letne dál juo njeallje jagi hárjehallan spabbačiekčama ja ovdánan bures. Mun liikon buoremusat čiekčat falleheaddjin ja bidjat moalaid ja Kristine ges liiko buoremusat leat guovdošillju. Dakko moai letne ge buoremusat. Suohttaseamos lea go searvat cup´aide eara báikkis. De mii lávet idjadit muhtin skuvllas ja lassin čiekčamiidda lávejit lágidit ollu suohttasiid. Dalle beassá oahpásmuvvat eará nuoraiguin.

Hárjeheaddji namma lea Sárá ja son lea čeahppi. Son čiekčá ieš nissonjoavkkus ja hárjehallá golmma geardde vahkkui. Mii eat hárjehala eara go guktii vahkkui, mánnodagaid ja duorastagaid. Dat lea dál vuos doarvái mu mielas.

Álggos go álgen čiekčat spáppa, ledjen nu boatkuluvvan ahte in bálljo nagodan vázzit tráhpaid. Muhto gorut fargga hárjánii. Dál lean sihke lášmat ja sávri. Lea dehálaš álo fanahallat dehkiid maŋŋel hárjehallamiid, minddar gal boatkuluvva. Erenoamážit juolgedeahkit čavget go olmmoš viehká ollu, muhto maiddái čielggi, bađa ja niskki láven fanahallat.

Hárjehusaš/Øvelse:

Jorgal teavstta dárogillii./ Oversett teksten til norsk.

 

 

This entry was posted in Uncategorized. Bookmark the permalink.