9.2: Gávppašeapmi
Elle ja Sárá leaba manname gávppašit eatni ovddas. Sudnos lea gávppašanlihppu mielde. Soai mannaba Spar nammasaš gávpái das ruovttu lahkosis.
– Oza mat dál dien lihpu vai besse oaidnit mii dasa lea čállojuvvon!
– Dá lea. Siđat go don dan?
– Gal mun sáhtán. …. eappelat ja tomáhtat.
– Vállje don tomáhtaid, mun ges čoakkán eappeliid.
– Ortnegis!
– Na mii vel lei?
– Na ovtta páhka geahppamielkki, vieččat go don dan?
– Gal mun vieččan. Lei go eará šat galbmaskábes?
– Vuorddes mat mun geahčan listtus… Na lákca han lei gal vel, guokte páhka.
– Viežžalan daid.
– Ja mun ges vieččan moniid ja garraláibbiid.
Soai deaivvadeaba fas go leaba viežžan maid galggaiga.
– Na mii vel galgá?
– Na juoidá munnuide, dan moai gal ieža válljejetne.
Nieidda-guovttos mannaba njuolga njálggeshilduide ja árvvoštallaba maid son heivešii oastit. Eadni lea suovvan goappáge guoktelogi ruvnno ovddas juoidá oastit. Elle lea hui váibmil šukkoládii ja gávdná fargga man háliida. Sárá ges háliida oastit čottanjálgáid ja suoskangumme, muhto lea váttis gávdnat goappašagaid juste guoktelogi ruvdnui. Loahpas son váldá dušše čottanjálgáid, dat mákset čiežanuppelot ruvnno. Soai mannaba kássii gálvvuiguin ja bordiba daid rámburbargi ovdii.
– Galgá go gálvobusse?
– Juo, guokte moai sihte!
– Šaddá guoktečuođiguhttalogiguokte ruvnno.
– Dá golbmačuođi!
– Naba guitte?
– Dan maid sihte! Giittos eatnat!
Nieiddat vázziba fas ruoktot goabbat gálvobussiin, šukkoláda ja čottanjálgát iežaska seahkas. Eatnis leat duođaid fales biiggát!
Vástit jearaldagaide:
- Gean ovddas Sárá ja Elle gávppašeaba?
- Maid soai gávppašeaba?
- Ollu go gálvu máksá ja ollu go báhcá ruhta?
- Maid soai dineba veahki ovddas?
- Oza buot substantiivvaid ja čilge daid kasushámi.
- Teavsttas leat partihkkalat nugo: ‘mat’ ‘ges’ ‘gal’ ‘son’ ‘han’. Mo dat leat geavahuvvon? Ráhkat cealkagiid dakkár partihkkaliiguin.
- Čále gávppašanlisttu (nominatiivvas), ja muital nuppi oahppái: “Mun áiggun oastit …… ja …… ja… ” (akkusatiivvas).
Loga grammatihkas: Partihkkalat
Hárjehala sániid biepmu birra: Leksa