12.1: Beassážat
Dál leat beassážat. Olbmot leat čoagganan Kárášjoga márkanii, go márkanis leat beassášdoalut. Beassážiid leat dábálaččat heargevuodjingilvvut, sihke Kárášjogas ja Guovdageainnus. Ollu turisttat leat boahtán Kárášjohkii, ja sisge soapmásat servet vuodjit gilvvu herggiiguin.
Beassážat leat maid sámi náitosiid áigi. Dalle leat heajat. Headjaguossit leat gárvodan sámegávttiiguin. Maiddái moarsi ja irgi leaba čiŋadan gávttiiguin. Moarsi oaivvis lea kruvdna mas heaŋgájit guhkes hearvabáttit. Irggis lea gákti ja rattis vilges ruossaliidni. Sus leat maiddái hervejuvvon gálssohat main heaŋgájit čáppa diehpit. Go náittosbárra vuolgá girkus, de čuovvolit mielvázzit. Buohkat vázzet headjavissui.
Ovddeš áiggiid headjaguossit lávejedje heasttaiguin johtit girkui ja headjaviesu lusa. Dán áiggi sii johtet biillaiguin, jos headjavissui lea guhkebuš mátki.
Beassážiid leat ollu doalut. Lestadiánalaččain leat čoakkalmasat. Ovdalis áiggiid čoakkalmasviesut ledje nuoraid áidna deaivvadansajit. Dán áiggi leat beassážiid maiddái konsearttat ja teáhterčájálmasat. Go beassážiid leat čáppa dálkkit ja beaivvádat, de olbmot liikojit čuoigat meahcis dahje vuodjit mohtorgielkkáin. Muhtun turisttat vulget badjesámi gođiide borrat sámi biepmu. Márkanis leat gilvočuoigamat, ja daidda servet juohkelágan olbmot.
beassášlávvordat – pääsiäislauantai, skilleduorastat – kiirastorstai, pálbmasotnabeaivi – palmusunnuntai, guhkesbearjadat – pitkäperjantai
- Ráhkat jearaldagaid bihtás, ja jeara nuppi studeanttas.
- Goas beassážat leat dán jagi?
- Muital maid don lávet dahkat beassážiid – dahje muital maid don dahket mannan beassážiid (preterihtas). Muitte geavahit genetiivva go muitalat goas juoga dáhpáhuvvá: beassážiid, guhkesbearjadaga jnv.
Loga maid Ánin Dánin s. 81