Meahcis

Viimmat ledje beassážat. Biret lei vuorddašan friddjabeivviid. Dovddai ahte dárbbaha muhtin luopmobeivviid dál. Ledje duođaid ollu áššit barggus, maidda ollu áiggi lei ferten bidjat ja mat ledje váibadan. Olbmát áigo messostallat, muhto Birehis ii lean gal miella. Hálidii návddašit friddjabeivviid olggu ovddas. Dálki lei juste nu go beassážiid galggai leat; beaivvádat ja bivval. Muohta čeaskái várregilggaid ja oalgguhii olbmuid meahccái. Biret ja Johan leigga ge meahccái vuolgime, Johana guođohanbartii. Doppe ledje buorit guollejávrrit lahkosis ja valjit čuoiganlahtut. Biret lei sihke viššalis čuoigi ja áŋgiris bivdi, nu ahte buot lei sutnje jur miela mielde. Soai leigga gávppašan ja páhkken, dál lei dušše reaga gárrat ja čavget.

Johanis lei ođđa skohter, Polaris 550, mainna vuoddjáiga. Biret čohkkái Johana maŋábealde ja dovddai biekka ámadadjui. Son dovddai ilu deavdime goruda ja fuobmái ahte mojohalai. Son rohttestii muhtin oahpes luođi ja huradii skohterjiena mielde. Gal dat juo lei somá meahcis vuojašit. Gálvoreahka šlivgasii skohtera maŋis ja  márkan fargga njavggodii. Miillat hurgiledje ja ovdalgo beaivváš luoitádii vuojisteigga soai bartta olggobeallái. Johan nuollagođii dalán reaga. Biret oaččui Johanis čoavdaga ja manai sisa. Siste lei galmmas ja seavdnjat. Biret bijai dola goikemuoraiguin mat siste ledje ja cahkkehalai čuovggaid. Johan guttii gálvvuid sisa ja ceggii sudno sabehiid olgoseainni vuostá. Biret čorgii gálvvu sadjái ja himihii vel, na eaba soai niesttehuvvat goit galgan, herskot ledje vaikko man ollu.

Fargga haksui varas gáfehádja ja barta lei liegganan. Varas gáffe ja šukuláda lei njálggat guhkes mátki maŋŋá. Soai guldaleigga radio ja humadeigga. Ihttin lei geahččalit guollelihku lagamus jávrris vuos, mii lei čuoiganmuttus. Jávrris galge leat sihke rávddut ja dápmohat. Olgun lei áigá sevnnjodan go Johan cábadišgođii suovasbierggu maid moarsásis ráhkadii. Biret ges ordnii fiidnát beavddi, gintaliid vel cahkkehii. Suovasbierggu hádja gal oaččui fártta borranlustui, lei buoremus maid Biret diđii. Maŋŋel borrama ozai Biret spealu mainna golahalaiga áiggi. Gal sudnos lei hearrá dilli ja luopmu lei easkka álgán.