Buot manná endorii
Guokte studeantta deaivvadeaba kantiinnas:
Máret: – Hei, Ánne! Mo manná? Don orut veahá šoavkat. Leatgo buohcamin?
Ánne: – Na hei, Máret. Dál gal vuoiga ii mana nu bures… Lean lohkamin eksámenii, muhto dovddan iežan nu šlundon. Čoavji maid lea bávččas.
Máret: – Ojá, goas dus lea eksámen?
Ánne: – Dál livččii moatti vahkku geahčen.
Máret: – Itgo jáhke iežat leat ráhkkanan doarvái bures? Dus lea ain áigi lohkat vaikko man ollu.
Ánne: – Na lea. Dattetge buot orru mannamin endorii. Lean lohkan beaivvi, muhto ii mihkkege oro darváneamen millii.
Máret: – Gula, hás don leat unnán oađđán. Dalle gal juohke ášši vearrána čuđiin.
Ánne: – Dáidá leat nu. Dasa lassin mun deddon ijaid. Mun nu balan eksámenis!
Máret: – It fal jo nu gal? Manne nu sakka balat?
Ánne: – Balan danne go mus lei heajos vásáhus diibmá. Ledjen oalle dilsi lohkat mannan lohkanbaji, inge orron máhttimin maidege eksámenbeaivve. Mus lei hui váivi maŋŋá eksámena. Árvvoštallen heaitit gurssain.
Máret: – Mun gal dieđán du čeahpes oahppin. Galggat lohkat viššalit dál, muhto maiddái vuoiŋŋastit. Dat lea erenoamáš dehálaš!
Ánne: – Jo. Dál in áiggo biehkut šat iežan baluid birra. Mo duinna manná?
Máret: – Muinna gal manná hui bures. Mus lea ođđa irgi ja dál lean lihkolaš.
Ánne: – Nugo? Dat gal ledje buorit ođđasat! Duvle orrot leamen nu lihkoheapme.
Máret: – Dál lea áibbas eará dilli. Lean nu ilus ahte sáhtášin girdilit. Dovddan iežan dego ođđa olmmožin.
Ánne: – Livččii hávski jus mii buohkat sáhtášeimmet deaivvadit goas nu maŋŋá eksámena.
Máret: – Jo, áinnas. Dasa mun gal illudan. Lihkku eksámeniin. Oaidnaletne!
Ánne: – Jo, mun maid. Oaidnaletne!
Bárrabargu: Ráhkadeahkki seammásullasaš ságastallama ja ovdanbukti dan eará studeanttaide.
Joavkobargu: Lohket rávvagiid buori psyhkalaš dearvvašvuhtii. Ohcet imperatiivvaid.
Gáldu: verdensdagen.no