Mo Sámediggi doaibmá?
Sámedikki dievasčoahkkin lea Sámedikki bajimus orgána ja eiseváldi. Dalle čoahkkanit buot áirasat. Dievasčoahkkin mearrida bargoortnega ja njuolggadusaid buot Sámedikki doaimmaide. Dievasčoahkkimat dollojit dábálaččat njelljii jagis, seamma vahkuid go lávdegoddečoahkkimat. Mánnodaga ja disdaga leat lávdegoddečoahkkimat, ja dievasčoahkkin dollo gaskavahkus bearjadahkii.
Sámediggeráđđi doaibmá Sámedikki ráđđehussan. Ráđi bargguide gullet earrát eará álggahit áššiid ja ovddidit árvalusa áššiin dievasčoahkkimii, ieš dahkat mearrádusaid ja čađahit buot Sámedikki mearrádusaid. Ráđđi doallá 10-12 čoahkkima jagis. Ráđi jođiheaddji lea presideanta, gii nammada ráđi miellahtuid.
Buot Sámedikki áirasat leat miellahttun ovtta dain golmma fágalávdegottiin, mat meannudit áššiid ja ovddidit mearrádusárvalusaid Sámedikki dievasčoahkkimii. Sámedikkis leat čuovvovaš fágalávdegottit:
- Plána- ja finánsalávdegoddi
- Bajásšaddan-, fuolahus- ja oahppolávdegoddi
- Ealáhus- ja kulturlávdegoddi
Lassin fágalávdegottiide lea Sámedikkis maiddái bearráigeahččanlávdegoddi ja válgalávdegoddi.
SáNuL lea Sámedikki nuoraidpolitihkalaš lávdegoddi. Sámedikkis lea maid sierra vuorrasiidráđđi.
- Maid SáNuL bargá?
- Maid Sámedikki vuorrasiidráđđi bargá?
- Ráhkat jearahallangilvvu (quiz) sámepolitihka birra. Dás heive juohkit joavkku guovtti oassái. Guktot joavkkut ráhkadit 10-15 jearaldaga man áigot jearrat nuppi joavkkus. Fáddán lea sámepolitihkka. Geavahehket vuolabeale neahttaresurssaid gáldun. Lágideahket de jearahallangilvvu. Goabbá joavku oažžu eanemus čuoggáid? Jearransánit
Sáhtát go čálihit iežat Sámedikki jienastuslohkui?
Loga / deavdde skovi: Čáliheapmi Sámedikki jienastuslohkui