Biera lei doppe olbmáidisguin

• Biera lei olbmáidisguin náveha luhtte eatni veahkeheame.
• Son humadii beatnagiinnis Čáhppiin go attii dasa láibevajahasa.
• Joavnna bođii maid gáfegohpuinis beavddi lusa ja jearahišgođii Tromsii ságaid.
• Dál lea áigi diehtit maid áiggun eallimiinán.

Bajábeale cealkagat leat vižžojuvvon Elle Márjá Vars Kátjá-girjjis. Juohke cealkagis lea substantiiva komitatiivvas mas lea oamastangeažus. Oza sániid ja čilge daid.

Oamastangehčosat laktásit substantiivvaide mat leat komitatiivvas ná:

• Ovttaidlogus: Oamastangeažus laktása komitatiivagehčosii, -in-.
• Máŋggaidlogus: Oamastangeažus laktása máŋggaidlogu genetiivahápmái, ja komitatiiva-geažus -guin boahtá maŋimužžan.

 

Lasit oamastangehčosa seammá minstara mielde vuolábeale cealkagiidda:

1. Eadni lei stobus mánáiguin.
2. Mun áiggun mannat dohko ustibiiguin.
3. Son cabai bierggu niibbiin.
4. Moai irggiin vulge juo bearjadaga.
5. Son gotti stuora luosa boares stákkuin.

Njálmmálaš bárrabargu.

1. Fuolkenamahusat: “Geainna don hupmet gáffádagas?” “Mun hupmen morsiinan.” jnv.
2. Reaiddut: “Mainna don oggot (čállet, čullet muoraid, gorrot….)?” “Oggon boares stákkuinan.” jnv.

 Sáhtát lohkat eanet oamastangehčosiid birra grammatihkas.