Kursačilgehus SAM-1031:
Bákkolaš bargobihtát
Kursaoahpaheaddji addá bákkolaš bargobihtáid studeanttaide, ja son dohkkeha daid. Bákkolaš bargobihtát galget leat dohkkehuvvon unnimustá guokte vahku ovdal eksámena. Lea dábálaš ahte studeanta oažžu čállosa ruovttoluotta divvumii ovdalgo bargobihttá loahpalaččat dohkkehuvvo, nu ahte sisaaddináigemearri ferte leat ollu árabut. Galget leat golbma čálalaš ja okta njálmmálaš bargobihttá. Dábálaš lea dáhttut ahte bihtás leat unnimustá 80 sáni. Ovdamearkkat:
- Mu birra.
- Mu beassážat.
- Juovllat.
- Mu vahkku.
- Joatkke dán muitalusa: “Ánnii lea gelddolaš beaivi. Odne fárre su ođđa irgi Romsii. Ánne lea guokte jagi dassái earránan ja orru okto mánáiguin. “
- Mu ruovttubáiki.
- Mu viessu ja mu bearaš.
- Mu sohka.
- Mu jahki.
- Čakča.
Njálmmálaš bargobihttá sáhttá leat ovdanbuktit fáddábarggu masa studeanta lea ráhkkanan ovddalgihtii, dahje studeanttat sáhttet smávva joavkun ráhkadit ja ovddanbuktit rollaspealuid. Gávnnat ideaid rollaspealuide dán siiddus – geahča Vuorddemeahttun ođas, Boares dovddut, Váttis kunddar.
Eksámena birra:
Kurssas lea sihke 6-diimmu čálalaš ruovttueksámen ja njálmmálaš eksámen.Dábálaš vuohki lágidit njálmmálaš eksámena:
Fágaoahpaheaddji ráhkada listtu fáttáin mat heivejit lohkanmearrái, omd. Orrunsadji, Biktasat ja ivnnit, Biepmut, Jagi áiggit, Unjárga, Studeantaeallin …. Studeanttat ožžot fáddálisttu moadde vahku ovdal eksámena.
Fágáoahpaheaddji vállje juohke fáddái su. 10 linnjá muhtun lohkanmearreteavsttas, ja ráhkada 3-4 jearaldaga, sihke tekstii ja friddja muitaleapmái, omd. “Makkár viesus don orut?”, “Muital makkár lanjat dus leat doppe gos don orut.” Bargobihtát sáddejuvvojit sensorii su. vahku ovdal go eksámen dollojuvvo vai sensor sáhttá dohkkehit dahje evttohit eará ládje. Eksámen galgá bistit su. 20 min. ja sáhttá juogo áddit guokte dákkár fáttá juohke studentii, dahje mearridit ahte nubbi fáddá lea muitalit iežas birra.
Vuosttaš studeanta boahtá sisa ja dearvvaha sensora. De fágaoahpaheaddji dáhttu studeantta muitalit iežas birra sensorii. Sihke sensor ja oahpaheaddji sáhttiba čuovvulit jearaldagaiguin. Dasto studeanta geassá bápirlihpu mas lea bargobihtá namma. Son galgá vuos lohkat jitnosit válljejuvvon teavstta, ja jorgalit dan dárogillii. Dan maŋŋil galgá vástidit jearaldagaide. Go son geargá, de boahtá čuovvovaš studeanta dakkaviđe sisa, ja son oažžu seammá bargobihtá go vuosttaš studeanta. Dáinna lágiin ii dárbbaš ráhkadit nu ollu bihtáid, ja lea maid vuogas buohtastahttit dan guokte studeantta. Dán guovtti studeantta maŋŋil heivešii doallat 10 min. bottu vai sensor ja fágaoahpaheaddji sáhttiba ságastallat bohtosiid birra.
Ja nu joatkašuvvá, guvttiin ja guvttiin studeanttain. Lea dábálaš mearridit árvosániid go buot studeanttat leat geargan.
Dáinna eksámenvugiin studeanta beassá čájehit ahte son
- máhttá lohkat jitnosit
- ipmirda teavstta
- máhttá sániid ja dain ráhkadit cealkagiid
- máhttá friddja muitalit iežas birra.