11.1: Sohka
Bearrašis leat dávjá eadni, áhčči, viellja ja oabbá, muhto sáhttet maid leat eadnebealle, áhččebealle, oabbábealle ja vielljabealle.
Sihke eatni vánhemat ja áhči vánhemat leat munnje áhkut ja ádját. Sin vánhemat leat fas mu máttarvánhemat.
Muhto mus leat eanetge fuolkkit. Eatni boarrásat oabbá lea mu goaski. Su nuorat oabbá lea mu muoŧŧá. Jus soai leaba náitalan, de sudno isidat leat mu mágat. Eatni viellja lea mu eanu. Su eamit lea fas ipmi munnje.
Áhči oappát leat mu siesát ja sin isidat leat maid mágat munnje. Áhči boarrásat viellja lea mu eahki, ja su nuorat viellja lea mu čeahci. Sudno eamidat leat munnje imit.
Buot mu siesáid, muoŧáid, goskkiid, čeziid, ednuid ja egiid mánát leat mu oambealit ja vilbealit.
Go mun náitalan, de leat mu eamida dahje isida vánhemat vuoni ja vuohppa munnje, ja soai leaba láhčamat mu vánhemiidda. Ja mun lean sudno mannji (jus lean nisu) dahje vivva (jus lean dievdu). Ovdal go moai náitaletne, de lean sudno mannjesássa dahje vivvasássa.
Olbmo geas lea seammá namma go mus, sáhtán gohčodit gáibmin.
- Sárggo fuolkenamahusaid (sukulaissanoja) muorran.
- Muital makkár sohka dus lea, ja gos du fuolkkit orrot.
- Loga Ánin Dánin girjjis s. 31. Geahča gova s. 30 ja muital olbmuid birra.
Hárjehala fuolkenamahusaid Leksain