1.1: VEARBBAT – čoahkkáigeassu

Vearbbaid sáhttá sojahit persovnna, logu ja áiggi mielde. Sámegielas leat golbma persovnna ja golbma logu. Oktiibuot dat dahket ovcci sojahanhámi.

Sámegielas leat guokte áiggi maid almmuhit sojaheami bokte; dálá áigi ja vássán áigi.

Moai bohte
Moai bođiime.

Doai oađđibeahtti.
Doai ođiide.

Muitte fal ahte vássán áiggis eai leat álo seamma persovdnagehčosat go dálá áiggis. Muitte maid ahte vearbbaid sáhttá juohkit golmma máttájovkui: bárrastávval-, bárahisstávval- ja kontráktavearbbat:

Son boahtá. Son bođii.
Son muitala. Son muitalii.
Son čohkká. Son čohkkái.

Vearbbain lea maid biehttalanhápmi, mii geavahuvvo biehttalanvearbbain ovttas. Biehttalanvearba sodjá persovnna mielde, ja váldovearba sodjá áiggi mielde:

Ovllá čuorvu. Ovllá ii čuorvvo.
Ovllá čuorvvui. Ovllá ii čurvon.

Sámegielas leat maid eará veahkkevearbbat go biehttalanvearba. Dat leat leat-vearba ja modála veahkkevearbbat. Veahkkevearbbat sodjet persovnna ja áiggi mielde, ja dat mearridit makkár hámis váldovearba lea:

Máhtte lea boahtán. Biera ja Sire maid leaba boahtán.
Máhtte lea boahtime. Moai letne maid boahtime.
Máret áigu searvat gilvvuide. Mun áiggun geahččat gilvvuid.
Elle ii gille searvat gilvvuide, muhto son gille geahččat.

 

Jorgal dán siiddu cealkagiid iežat gillii!

 

Hárjehala seahkálas vearbabihtáid Morfa-C:s.

 

Loga eambbo!

Vearbbat – Indikatiiva

 

Boahtte ceahkkái: Ceahkki 1.2