11.5: Murjen
Muorjjit leat leamaš hui dehálaččat sápmelaččaide, sihke gávpegálvun ja borramuššan. Eanáš murjjiin leat ollu vitamiinnat mat leat dahkan olbmuide vejolažžan birget dáppe davvin.
Dolin lei erenoamážit jokŋa dehálaš go lei álki daid vuovdit ja nu sáhtii tinet veháš. Dán áigge soaitá luomi leat dehálaččat. Luopmániin lea buorre haddi, ja go lea buorre luomejahki, de manná johtilit daid čoaggit.
Min guovllus leat eará muorjjit maid, nugo sarrit ja čáhppesmuorjjit. Sarriin olbmot ráhkadit sávtta ja vuššet measttu. Sarrit heivejit maid gáhkuide. Čáhppesmurjjiid gazze ovdal milkkiin, muhto dál olbmot ráhkadit sávtta, viinna ja likøra. Muhtun vákkiin šaddet váramat. Ja muhtun sajiin lea vejolaš gávdnat jierehiid.
Lihkus eai buot muorjjit látta oktanaga. Olmmoš gii lea áŋgir murjet, sáhttá murjet suoidnemánu loahpas gitta čakčamánu beallemuddui.
Loga ja guldal Ánin Dánin-girjjis s. 17: Murjen jietnafiila ja loga vel s. 84 Meahcis.
- Muital makkár murjjiid don lávet čoaggit ja gos don čoakkát daid.
- Muital maid murjjiide don liikot, ja maid don lávet ráhkadit murjjiin.
Muohtačalmmit
Pedar Jalvi lea čállán divttaid. Deaddil vuos dán ja de divtta liŋkka: Muohtačalmmit. Loga teavstta ja guldal.
- Maid Pedar Jalvi háliida muitalit midjiide?
- Makkár luonddusánit leat divttas? Jorgal daid.
Hárjehala luonddusániid Leksain