7.2: Ristena ja Ándde beaivi
Ristena ja Ándde beaivi – jietnafiila
Risten lea 22 jagi boaris ja vázzá dáiddaskuvlla Oslos. Son lea náitalan. Ánde, su isit, bargá suohkanis. Sudnos lea guovttejahkásaš mánná. Máná namma lea Márjá. Juohke iđida dii. 6 Ánde ja Risten lihkkaba ja borraba iđitbiepmu ovttas Márjjáin. Soai borraba láibbi, ja Márjá borrá buvrru.
Go sii leat boradan, de sii gárvodit ja vázzilit togastašuvdnii. Sii mannet gávpogii togain mii vuolgá dii. 7.15. Togamátki ii leat nu guhkki – muhto olmmoš geargá gal logastit áviissa. Dii. 7.50 juo sii leat gávpogis. Ii leat guhkes mátki mánáidgárdái. Stašuvnnas mánáidgárdái ádjána dušše 10 min vázzit. Soai guođđiba Márjjá mánáidgárdái. Risten álgá skuvlii dii. 8.15. Ánde bargá ráđđeviesus, ja sus álgá bargu 8.30. Ristenis lea guhkes borranboddu go son lea studeanta. Su borranboddu bistá dii. 11.50 rájes gitta ovtta rádjái. Bargoolbmuin lea dábálaččat dušše diibmobeal borranboddu.
Veaigin dii. 16 Risten viežžá Márjjá mánáidgárddis. Ánde ii leat vel geargan barggus, son bargá gitta 16.15 rádjai ja son manná njuolgga barggus togastašuvdnii. Sii deaivvadit stašuvnnas ja vulget ruoktot togain mii manná dii. 16.35. Sii leat buohkat váiban guhkes beaivvi maŋŋil. Šaddá maŋŋit ovdalgo ollejit ruoktot.
Ánde dat málesta. Easka dii. 17.50 sii borret gaskabeivviid ovttas. Maŋŋil lea dilli humadit ja stoahkat unna Márjjážiin. Go Márjá lea mannan nohkkat, de Risten ja Ánde geahččaba ođđasiid. Dalle lea dii. 21.00 eahkedis.
Ráhkat jearaldagaid eará studeanttaide dán teavsttas. Ávkkálaš dajaldat: galle áigge? (på hvilket tidspunkt?)
Hárjehala eanet pronomeniiguin: pronomenat 2.